باشترین هونەرمەندی كوردستان و عێراق لەژێر نایلۆندا دەژی : باشـترە بـڕۆم

عومەر چاوشین ئەوكاتەی لە فیستیڤاڵێكی ئیسپانیا بڕیاری خەڵاتكردنی وەك باشترین ئەكتەر دەرچوو، لە كەلاوەكەیدا لە پیرزین لە نەبوونیاندا خەم دایگرتبوو. چاوشین نازانێ لەكام دەلاقەی مەینەتی و كوێرەوەرییەكانی ژیانییەوە دەست پێ بكات، كەس عومەر چاوشینی بیر نەماوە لە حكومەتی كوردستاندا، ئەو هونەرمەندەی بۆ یەكەمجار شۆڕشێكی تازەی بەرپاكرد لەنێو هونەری كوردیدا.
ژیانی عومەر چاوشین، لە ژیانی هیچ كام لەو پاڵەوانە بێنەوایانەش ناچێت كە رۆماننوسە بەنێوبانگەكانی وەك (هەمەنگوای) و(دیستۆفیسكی) نیشانیدەدەن، پیاوێكی گەڕیدەو هەمیشە بێ پارە، وەك خۆی دەڵێ "لەكەلاوەیەكدا دەژیم و هەر شەوەو لەجێگەیەك دەخەوم، حكومەت غەدرم لێدەكات و دەرهێنەرەكانیش خراپتر".

وەك بلەی سەعەكەڕ
سەگ و پشیلە دەمخۆن

هەر لەسەرەتای قسەكردنیدا لە نووسینگەی سلێمانی (رووداو)، چاوشین بەنیگەرانییەوە چارەنووسی ژیانی خۆی لەو كۆمەڵگەیەدا دیاریكرد، كە ئەو زیاتر لە 45 ساڵە بەگیرفانی خاڵییەوە كاری بۆ دەكات "منیش وەك بلەی سەعەكەڕ لە كەلاوەكەمدا دەمرم و سەگ و پشیلە لاشەكەم دەخۆن، یان كەلاوەكە دەڕوخێت بەسەرمدا، یان ئاو دێتە ژوورەكەم و دەخنكێم و رەق دەبمەوە". هونەرمەند بلەی سەعە كەڕ، ئەمساڵ لە كەلاوەیەكدا لە ناحیەی دارەتوو كۆچی دواییكرد، دوای هەفتەیەك ئینجا خەڵك بە مردنەكەی زانی. دوای ئەوە د.رۆژ نوری شاوەیس، جێگری سەرۆك وەزیرانی عێراق ، وتارێكی لەسەر خۆڕاگری و شۆڕشگێڕی ئەو نووسی.
بۆ یەكەمجار، عومەر چاوشین لە ساڵی 1967چووە سەرتەختی شانۆ، دواتر لە تەلەڤزیۆنی بەغداوە لەچەند كارێكی هونەریدا دەركەوت "ئەوكاتەی ئێمە كارمان دەكرد، هیچ نەبوو، بە دەردەسەرییەكی زۆر چەند كارێكی شانۆیی و تەلەڤزیۆنیمان دەكرد لەگەڵ مامۆستا ئەحمەد سالار".

نەیانبردە فەرەسا و ئیسپانیا

ئەو گلەیی لە چەند دەرهێنەرێك دەكات، چونكە وەك خۆی دەڵێ مافیان خواردووە "فیلمی (راوەجنۆكە)مان دروستكرد كە مەهدی ئومێد دەرهێنەری بوو، لەچەند وڵاتێك خەڵاتی یەكەمی هێنا، دواتر فیلمی (سرتە لەگەڵ با) مان دروستكرد و بەشداری خەڵاتی (كان)ی كرد، لەفەرەنسا بە رۆڵی من سەرسام بوون و داوای بینینی منیان كردبوو، بەڵام دەرهێنەرەكە (شەهرامی عەلیدی) درۆی كردبوو و گوتبووی : كاری هەیە و سەرقاڵە. منی نەبرد".
لە فیستیڤاڵی ئیسپانیادا خەڵاتی باشترین ئەكتەر، دوای نمایشكردنی فیلمی (سرتە لەگەڵ با)دا بەخشرایە عومەر چاوشین، بەڵام عەلیدی لەجیاتی ئەو وەریگرت.
عومەر چاوشین هەروەها دەڵێ "لە فەرەنساوە داوەتنامەیان بۆ ناردبووم، كەچی داوەتنامەكەم پێنەگەیشت، دیسان لە ئیسپانیاوە داوای منیان كردبوو، گوتبوویان نەخۆشە و ناتوانێ بێت"، ئەو لە داخی ئەو ژیانەی لە كوردستان هەیەتی دەڵێ "بەڵام ئەگەر بڕۆم بۆ ئیسپانیا، شەرت بێ نەیێمەوە".
عومەر چاوشین، بڕیاریداوە كوردستان بەجێبێڵێ "چەند كارێكی هونەریم هەیە لە سلێمانی لەگەڵ هاوڕێ مستەفا، ئەو ئیشانە تەواو بكەم هەر دەڕۆم. چونكە تائێستاش كە لە هەولێر ماومەتەوە، هۆی ئەوەیە خەڵكەكەی فەقیر و بەویژدانن و هاوكارییان كردووم".

"شەمۆ بۆ وا دەكات"

چاوشین بە هەندێك لەوانە پەستە بەناوی هونەرەوە كاری سەرپێیی دەكەن و دەڵێ "باشە شەمۆ بۆ وا دەكات، چۆن بە سێ رۆژ فیلم دەردەكرێت، خۆ ئەو هونەرەجوانەكانی موسڵی خوێندووە بۆ وادەكات؟ بەڕاستی ئەمانە هونەریان كردووە بە پەند".
ئەو هونەرمەندە، كە ئێستا لە كۆمەڵگەی پیرزین لە رۆژهەڵاتی هەولێر لە خانوویەكی كەلاوەدا دەژی و بەنایلۆن سەری خانووەكەی گرتووە، لەوپەڕی فەرامۆشكراویدا دەژی، لەكاتێكدا ئەو شۆرشێكی گەورەی بەرپاكرد و تاكە كەس بوو لەسەر تەختی شانۆی كوردی رۆڵی ئافرەتی بینی تاوەكو بۆشاییەكان پڕبكاتەوە.
ئەو لەبارەی ئەو ئافرەتانەوە ئێستا كاری نواندن دەكەن دەڵێ "ئێستا بەئافرەت دەگوترێ كێ دەهێنی لەگەڵ خۆت بیهێنە و چۆنت پێباشە وا وەرە، بەس بۆ ئەوەی بەشداری بكات، كەچی هێشتا داوای پارەیەكی زۆر دەكات، بەڵام من بە 10دینار رۆڵی ئافرەتم دەبینی".
ئەو رۆڵە ئافرەتییەكانیشی زۆر بەجیدییەوە بینیوە " جارێكیان ئەحمەد دەنگ گەورە پێیگوتم ، ئەگەر بەرد بارانیشت بكەن وازمەهێنە، چونكە كارەكانت زۆر جوانە، ئەوەندە ژنێكی جوانی لە رۆڵ بینیندا، حەزم لێكردووی".

كەس باوەڕی پێناكات

عومەر چاوشین، مووچەیەكی رێزلێنانی هەبوو كە 300هەزار دینار بوو لەگەڵ موچەیەكی خانەنشینی، بۆخۆی وازی لە خانەنشینییەكەی هێناوە تاوەكو بەبیانووی دوو مووچەیی 300كەی لەكیس نەچێت. ئێستاش زۆر كەم داهاتی لەكارە هونەرییەكانی هەیە و ناچارە هەر ئەوە بكات "ئەوەندە كاری هونەریم كردووە ئەگەر پاكەتیش بفرۆشم كەس لێم ناكڕێ و دەڵێن كامێرای شاراوەیە".
عومەر محێدین عەبدوڵڵا ، لەدایكبووی ساڵی 1942ی شاری سلێمانییە و 43ساڵە كاری هونەری دەكات و دەرچووی پەیمانگەی هونەرە جوانەكانی بەغدایە. وەك خۆی دەڵێ، بەشداری شۆڕشی ئەیلولی كردووە.
هەرچەندە تائێستا 3 ژنی هێناوە، بەڵام ئاگای لە هیچ كام لە ژنەكانی و منداڵەكانی نەماوە "ژنی یەكەمم لەگەڵ ژیانی هونەریم نەدەگونجا، هەمووجار دەمگوت ناكرێ تۆ لەگەڵ خۆم ببەم دەیگوت ئیللا دێم، دوو منداڵم لەو هەبوو لەگەڵ خۆی برد و رۆیشت"، لەبارەی ژنی دووەمییەوە دەڵێ "شێت بوو، شەوانە بەدەم خەوەوە تەسجیلێكی دادەگیرساندو گۆرانی نوری گەرمیانی لێدەدا و بەجادەكاندا دەسوڕایەوە و بەیانیان پۆلیس بۆیان دەهێنامەوە". سەبارەت بەژنی سێیەمیشی كە ئێرانی بووە دەڵێ "كچێكم لەویش هەبوو، براكەی دیل بوو، كاتێك هاتەوە نەیهێشت لەگەڵیان بم و پێی تەڵاقدام، بۆیە ئاگام لەهیچ كام لە ژنەكان و منداڵەكانم نەماوە".
پێش دوو مانگ هونەرمەند تەها خەلیل كۆچی دوایی كرد، زۆر گریاوە بۆی "زۆر لەمنەوە نزیكبوو". پەیوەندی لەگەڵ حاجی مەكی (عەلییە فەندی) خۆشە و دەڵێ "ئەو زۆر سەركەوتووبوو، قەت حیواری لەبەر نەدەكرد. ئێستا كە دەیبینم پێیدەڵێم تۆ قەت چاوت لەپارە تێر نابێ".

داوام لە حكومەت ئەوەیە
تەنیا شوێنێكم بداتێ

لەسەرەتای مانگی 12ی ئەمساڵدا چاوشین لە فیستیڤاڵی سینەمای عێراقی داوەتكرا و خەڵاتی یەكەمی پێدرا وەك باشترین ئەكتەری عێراق و كوردستان. بەڵام ئەو باشترین ئەكتەرەی كوردستان، خراپترین ژیانی لە وڵاتەكەیدا بەڕێدەكات "پارە بۆ زۆر كەس هەڵدەڕێژن كە شیاوی هیچ نین، من تەنها داوام لە حكومەت ئەوەیە شوێنێكم بداتێ تێیدا بژیم، دیارە حكومەت تەنها پیاوكوژی دەوێ و منیش پیاوم پێناكوژرێ، بۆیە باشترە بڕۆم".