(( هونه‌رمه‌ند دیاری قه‌ره‌داغی زیاتر له‌دوو ساڵه سه‌رقاڵی خۆئاماده‌كردنه بۆ ئه‌لبوومی (رێی باران) كه له(نۆ) تراك پێكهاتووه‌و له‌لایه‌ن ئاڤه میدیاوه به‌رهه‌مده‌هێنرێت....
له‌دیدارێكدا هونه‌رمه‌ند دیاری قه‌ره‌داغی وتی: ((له‌م ئه‌لبوومه‌مدا هه‌وڵمداوه مامه‌ڵه له‌گه‌ڵ شاعیره دیارو جۆراو جۆره‌كان بكه‌م له‌ڕووی چه‌شن و ستایلی شیعره‌كه‌وه، بۆ نموونه مامۆستا عه‌بدوڵلا په‌شێو، محه‌مه‌د عومه‌ر عوسمان، به‌ختیار عه‌لی، ئه‌حمه‌د محه‌مه‌د، عارف قوربانی، هه‌روه‌ها شاعیری كوردستانی رۆژهه‌لات ئه‌فشین محه‌مه‌دی، نه‌ورۆز عه‌باس، له‌گه‌ڵ یه‌كێك له‌شاعیره‌كان به‌ناوی شه‌هیده‌وه كه پێشتر شیعری سه‌رۆكه‌كانی بۆ من نووسیوه، ئه‌م شاعیرانه ئه‌زموونی منیان ده‌وڵه‌مه‌ند كردو به‌رهه‌مه‌كانی منیان جوان كرد)).
دیاری ئاماژه‌ی به‌وه‌شكرد كه له‌و ئه‌لبوومه‌یدا ژماره‌یه‌كی زۆر له‌میوزیكژه‌نان به‌شدارییانكردووه‌و ستایلی گۆرانیه‌كانیشی هه‌ریه‌كه‌یان جۆره ستایلێكه، به‌لام هه‌موویان له‌چوارچێوه‌ی ئه‌و ستایله‌ن كه هه‌واداران و گوێگران (دیاری) پێ ده‌ناسن و كه‌شێكی رۆمانسی ته‌واو به‌سه‌ر سیدیه‌كه‌دا زاڵه. باسی له‌وه‌شكرد كه‌به‌رهه‌مێكی تایبه‌تی بۆ كه‌ركوك وتووه.
ئه‌و وتیشی: ((جگه له‌خۆم كه‌سانی دیكه‌ش ئاوازیان بۆ داناوم له‌وانه فه‌رهاد محه‌مه‌د ساڵح كه كاری میوزیكیشی بۆ كردووم و له‌سوید تۆماری كردووه، هه‌روه‌ها سوپاسی هونه‌رمه‌ندان هێمن حسێن، دلێر حسێن، كارزان مه‌حمود، محه‌مه‌د ماجید، سه‌فین خه‌راجیانی، كارزان كامیل، بڵند قه‌ره‌داغی و ئاریان جه‌لال ده‌كه‌م له‌گه‌ڵ هه‌موو ئه‌وانه‌ی كه هاوكاریان كردووم.
دوو له‌گۆرانییه‌كان له‌ئه‌وروپا و ئه‌وانه‌ی دیكه‌ش له‌هه‌ولێرو سلێمانی تۆمار كراون، كه ئارا ئه‌حمه‌د له‌ستۆدیۆی لانه‌ى ده‌نگ دوو كاری بۆ میكس كردووه‌و هه‌روه‌ها له‌ستۆدیۆكه‌ى هونه‌رمه‌ند كارزان كامیل (ستۆدیۆی پیانۆ)و له‌هه‌ولێریش سێ به‌رهه‌می له‌ستۆدیۆی میلۆدی و له‌ستۆدیۆكه‌ی هونه‌رمه‌ند سه‌فین خه‌راجیانی و هه‌روه‌ها ئارابخا ستودیو له‌لاى كاك رێباز قاسم و له‌ستۆدیۆی سه‌هه‌ند-یش به‌رهه‌مێكم تۆماركردووه‌و له‌توركیا كاری ماسته‌رینی بۆ كردووه)).
وتیشی: ((به‌نیازم كلیپێك بۆ تراكی یه‌كه‌م بكه‌م به‌ناوی ژانی ئه‌به‌دی و كلیپێكیشم وێنه‌گرتنی ته‌واو بووه كه بۆ كه‌ركوكه‌و به‌شێكی دیمه‌نه‌كانی له‌سلێمانی و به‌شێكی دیكه‌شی له‌كه‌ركوك وێنه‌گیراوه، كه له‌ده‌رهێنانی سینه‌ماكاری كوردستانی رۆژهه‌لات ره‌حیمی زه‌بیحییه‌و ده‌مه‌وێت دوای ته‌واو بوونی به‌رهه‌مه‌كه‌شم بیر له‌وه بكه‌مه‌وه كۆنسێرتێكی گه‌وره به‌ڕێوه‌ببه‌م)). .............................................
به بۆنه‌ی جه‌ژنی نه‌ورۆزه‌وه پیرۆزبایی ئاراسته‌ی هه‌ر چوار پارچه‌ی كوردستان ده‌كه‌ین به هیوای ئازادی له نه‌ورۆزی داهاتوو
