لاوێکی کوردی کوردستانی ئێران توانی ببێته به‌رپرسی گشتی ماڵپه‌ڕی
به‌ناوبانگی Youtubeو له ریزی سه‌رکه‌وتووانی جیهاندا ناوی تۆمار بکرێت.
به‌پێی راگه‌یه‌ندراوی ماڵپه‌ڕه هه‌واڵنێرییه به‌ناوبانگه‌کانی جیهانی،
پاش کڕینی ماڵپه‌ڕی Youtube له‌لایه‌ن کۆمپانیا و ماڵپه‌ڕی (گوگڵ) ـه‌وه
به نرخی یه‌ک ملیار و 65 ملیۆن دۆلار له ساڵی 2006دا، چاد هارلی
له‌وکاته‌وه تائێستا به‌رپرسی گشتی ماڵپه‌ڕیYoutube بوو، ماوه‌یه‌ک
له‌مه‌وبه‌ر پۆسته‌كه‌ی خۆی به‌خشییه “سالار که‌مانگه‌ر” که لاوێکی کوردی
کوردستانی ئێرانه و دانیشتووی ویلایه‌ته یه‌کگرتووه‌کانی ئه‌مریکایه.
سالار که‌مانگه‌ر چه‌ند رۆژ پێش ئێستا جێگری به‌رپرسی به‌شی به‌رهه‌مه
تایبه‌تییه‌کانی گوگڵ بوو و له‌م رۆژانه‌دا به‌رپرسایه‌تی گشتی Youtubeی پێ
سپێردراوه، ناوبراو پێشتر به‌رپرسایه‌تی چه‌ندین به‌شی تری (گوگڵ) ی له
ئه‌ستۆدا بووه.
چاد هارلی له وته‌یه‌کدا که له‌سه‌ر ماڵپه‌ڕی youtube یش دانراوه،
ده‌ڵێت: له دوو ساڵی رابردوودا من زۆرتر وه‌کو راوێژکارێک له‌م به‌شه‌دا
كارم کردووه‌و به‌رهه‌م و چالاکییه‌کانی ئه‌م ماڵپه‌ڕه رۆژ له دوای رۆژ
له‌لایه‌ن سالار که‌مانگه‌ره‌وه به‌رهه‌م هاتووه‌و من وه‌کو راوێژکارێک
ئیشی خۆم درێژه پێده‌ده‌م و هیوادارم قۆناغێکی نوێ له ژیان و چالاکی ئه‌م
ماڵپه‌ڕه بێته‌دی.
شایانی باسه سالار که‌مانگه‌ر له ساڵی 1977 ی زایینی له کوردستانی ئێران
له دایکبووه و ده‌رچووی به‌شی بایۆلۆجی زانکۆی ئیسته‌نفۆردی
ئه‌مریکایه‌و له ته‌مه‌نی 22 ساڵییه‌وه هاوکاری (گوگڵ) ـه‌و پاش 7 ساڵ
کاری به‌رده‌وام له‌گه‌ڵ ئه‌و کۆمپانیایه‌دا، توانی ببێته یه‌کێک له
سه‌رکه‌وتووترین و ناسراوترین به‌رپرسانی ئه‌و کۆمپانیایه‌دا.
که‌مانگه‌ر به‌ته مه‌نی 33 ساڵی گه‌نجترین به‌رپرسی (گوگڵ) ـه‌و 13یه‌مین که‌سه که له‌لایه‌ن ئه‌و کۆمپانیایه‌وه دامه‌زراوه
به بۆنه‌ی جه‌ژنی نه‌ورۆزه‌وه پیرۆزبایی ئاراسته‌ی هه‌ر چوار پارچه‌ی كوردستان ده‌كه‌ین به هیوای ئازادی له نه‌ورۆزی داهاتوو
