یێژن جەماعەتێ خاس، خوا ناردی
خاسێكیان دەسكەوت، خۆتان ئەزانن خاسیش خەراوی هەس و باشیشی هەس، بۆیە بەبێ
ئەوەی كۆڕو كۆبوونەوەو زیزبوون و ئاشتبوونەوەی نیشتیمانی و پەیمان و مەیمان
ببەسن، بڕیاریكی عمومیان نا، و موباشەرەتەن خرایە واری جێبەجێكردنیشەوە.
بڕیارەكە زۆر سادەبوو، وەلێ زۆریش پێویست بوو. با لێتانی نەكەمەوە
مەتەڵەكانی تەشكیلی حكومەت و مۆركردنی میزانیەو بەخەتەركردنی خەتەنەو شەڕی
تازە باوی نێوان مەلا و فاسق، من لەوانە زووتر بۆتانی ئەگێڕمەوە، ئەگەرچی
پێشتریش بە مەسەلم هێناوەتەوە بۆ شتی تر، ئەمما موشتەری جددی نەبووە، رەنگە
ئەمجارەیان موشتەری هەزليی هەبێ، چونكێكم ئەگەر بۆ پێكەنین بێت، هەموو شتێ
موشتەری زۆرە، لە وڵاتێكا یەك تاقە بێستان رنی تیا نەماوە، یا خۆخۆرە، یا
گندۆرە (كاڵەك/ ناوە عیلمییەكەیەتی) خۆرە. ئەمەش بۆ هەرێمێكی ساوا زۆرە،
گریان وە حاڵی خۆمان نەمابێ، شیلاوی پێكەنینیش بمانگرێ نۆرە بەنۆرە.
ئەو جەماعەتە موبدیعە كە خاسەكەیان دەسكەوت، هەر لەنێو خۆیانا مام
مۆتكێكیان لێ پەیدابوو و وتی: كوڕینە نەبادا دوایی پەشیمان بینەوە و پەلكە
خاسە خراوەكان بخۆین وەرن با میزی پیا بكەین. هەموو ئەشهەدوویان بۆكرد و
واشیان كرد، كەچی هەر زوو یەكێكیان بەئەسپایی پەلكێكی هەڵگرتەوەو دایوەشان
و وتی: ئای. وابزانم ئەمەیان میزی بەرنەكەوتووە ( ئەو پەلكیانی خوارد)،
ئەویتریانیش پەلكێكی هەڵگرتەوەو وتی: وابزانم ئەمەشیان بەری نەكەوتووە،
ئەویش پەلكێكی بەمیزی دیكەی خوارد. عاقیبەت پەلكە میزاوییەكانیان هەموو
خوارد و هەر فوویان تێدەكردو مناڵ وتەنی بەبێ مەعنا. عەوجەی ئەبوونەوە.
ئەلحەقە خاتوو عێراقیش عەینەن پەلكە میزاوییە خۆرەكانن، رۆژێكیان ئەڵێن: با
نەقەومێ هەنێ لە ئەبتاڵەكانی قادسییە لەژێر ناوی دیكەیا بێنینەوە مەیانەكە،
تا هەنێ لە ئیرهابییەكان قایل كەین و وەزعەكە هەنێ ئەهوەنتر بێ. رۆژێكیش
بڕیاری لادانی شەرمەزاری لەسەر كەسێكی دیار دەر ئەكەن و لەپاشان ئەیكەن بە
نائیبی رەئیس جمهور، ئەویتریان دائەوەشێنن و ئەیكەین بە قوفلی دەركردنی
بڕیارەكان. وەلحاسڵ رۆژێ پەلكێكی میزاوی ئەخۆن و ئەڵێن: ئەها ئەمەیان میزی
بەرنەكەوتووە بەخوا..!!
شەشی ئەم مانگەش كردیان بە عوتلەی رەسمی، لە چەندین خەڵكم ئەبیست حەفتەیەك
بەر لەو بەروارە ئەیان وت: ستە كانونیش عوتڵەیە. من هەر بڕوام نەئەكر. كەچی
لەپڕ كردیان! تۆ بڵێی لەچیی عەسكەری حكومەتی پێشوو شەرمەزار بن، تا یادی
دامەزراندنی لەبیر نەكەن، راوەدوونانی شەعب، یا تێكدانی ماڵەكانیان، یان
نانەوەی گۆبەندێك كە ئەمەی ئەمڕۆی بەرهەمهانی..؟!
سەرەڕای ئەوەش ئەوەنە عەرەب بەناوی تەئاخی فەرموو فەرموویان لێكراوە،
قەیسەری هەولێریان كردووەتە شۆڕیجە، خۆمن حەیفەتی تەئاخی و برایەتی مۆقەت و
دایمی نامكوژێ، ئەوە منی كوشتووە كە ئێمە لەجنوبی ئەم عیراقە كاتی خۆی نەفی
بووین، وەكو عەرەبانەكەی لەبلەبی بە (كاكێ كاكێ) دوامان ئەكەوتن، حەیای
حەفتەیەكیان بردبووین، توخوا ئێستا حەقی خۆی نییە ئێمەش بە یابە یابە
دوایان بكەوین؟ هەتا بەم حەساوە كراوەبێ ئەم پەنجەرەو بابە.
به بۆنه‌ی جه‌ژنی نه‌ورۆزه‌وه پیرۆزبایی ئاراسته‌ی هه‌ر چوار پارچه‌ی كوردستان ده‌كه‌ین به هیوای ئازادی له نه‌ورۆزی داهاتوو
